गलकोट (बागलुङ) । बागलुङको धौलागिरी प्रादेशिक अस्पतालमा विषालु सर्पले टोकेर गम्भीर अवस्थामा पुगेका एक वृद्धको सफल उपचार गरिएको छ ।
निसीखोला गाउँपालिका–७ राजकुटका ६० वर्षीय जुठे विकलाई शनिबार बिहान घरमै सर्पले टोकेको थियो । सर्पको टोकाइबाट बेहोस भएका उनलाई परिवारले तत्काल अस्पताल पुर्याएका थिए । अस्पतालमा उपलब्ध विशेषज्ञ चिकित्सक र एन्टिस्नेक भेनम सहितको टोलीले विकको ज्यान जोगाउन सफल भएको हो ।
अस्पताललाई सर्पदंश उपचार केन्द्रका रूपमा स्तरउन्नति गरिएपछि यस्तो जटिल प्रकृतिको उपचार गरिएको यो पहिलो पटक हो । यसअघि अस्पतालमा सर्पदंशका बिरामी आए पनि प्राथमिक उपचारपछि अन्यत्र रेफर गर्ने गरिएको थियो । बागलुङमै यो सेवा प्रभावकारी रूपमा सुरु भएपछि अब स्थानीयले समयमै उपचार पाएर अकालमा ज्यान गुमाउनुपर्ने अवस्थाको अन्त्य हुने विश्वास गरिएको छ । उपचारपछि निको भएका विकलाई अस्पतालले घर पठाउने तयारी गरेको छ ।
अस्पताल प्रशासनले सर्पले टोकेमा धामीझाँक्री वा घरेलु उपचारमा समय खेर नफाली सिधै अस्पताल आउन सर्वसाधारणलाई अपिल समेत गरेको छ । (रासस)
