काठमाडौँ । जल तथा मौसम पूर्वानुमान महाशाखाका अनुसार मुलुकका विभिन्न भू-भागमा अहिले मनसुनीसँगै पश्चिमी र स्थानीय वायुको मिश्रित प्रभाव देखिएको छ ।
हाल कोशी, मधेस र बागमती प्रदेशसहित गण्डकीका केही र लुम्बिनीको पूर्वी क्षेत्रमा मनसुनी वायु सक्रिय छ । देशका अन्य बाँकी हिस्सामा भने पश्चिमी र स्थानीय वायुको आंशिक असर रहेको मौसमविद्ले जनाएका छन् ।
अहिले देशभरका पहाडी तथा हिमाली भेगमा साधारणतया बदलीको अवस्था छ भने तराई क्षेत्रमा आंशिक बदली रहेको छ । बागमती, गण्डकी र लुम्बिनी प्रदेशका पहाडी भू-भागका थोरै स्थानहरूमा मेघगर्जन र चट्याङसहित हल्का वर्षा भइरहेको छ ।
आज दिउँसो कोशी प्रदेशको तराई र देशका उच्च पहाडी तथा हिमाली क्षेत्रमा साधारणतया बदली रहने सम्भावना छ । मधेस, बागमती र गण्डकी प्रदेशका मैदानी भू-भागमा आंशिक बदली हुने देखिन्छ भने लुम्बिनी र सुदूरपश्चिमको तराईमा मौसम मुख्यतया सफा रहने पूर्वानुमान गरिएको छ । हिमाली र पहाडी भेगका केही स्थानमा चट्याङसहित मध्यम वर्षा तथा उच्च हिमाली क्षेत्रमा हिमपातको सम्भावना छ । यसका साथै कोशी र मधेस प्रदेशका तराईका केही स्थान र बागमती तथा गण्डकीको तराईका एक-दुई स्थानमा पानी पर्ने देखिन्छ ।
मौसम विभागका अनुसार लुम्बिनी र सुदूरपश्चिमका तराई क्षेत्रमा आज तातो हावा (लू) चल्ने सम्भावना छ । बागमती र गण्डकीको तराईमा पनि तापक्रम बढ्न सक्ने भएकाले ती क्षेत्रका बासिन्दालाई आवश्यक सतर्कता अपनाउन महाशाखाले विशेष आग्रह गरेको छ ।
आज राति कोशी, बागमती र गण्डकीका पहाडी तथा हिमाली क्षेत्र, कोशीको तराई र मधेस प्रदेशमा साधारणतया बदली रहनेछ । अन्य प्रदेशका पहाडी भू-भागमा आंशिक बदली रहँदा लुम्बिनी र सुदूरपश्चिमको तराईमा भने मौसम सफा रहनेछ । रातिको समयमा पनि कोशी, बागमती, गण्डकी र मधेस प्रदेशका केही स्थानहरूमा चट्याङसहित मध्यम वर्षाको सम्भावना कायमै रहने महाशाखाले बुलेटिनमार्फत जानकारी दिएको छ ।
