काठमाडौँ । देशैभर मनसुनी वायुको सक्रियता कायम रहँदा आगामी २४ घण्टाभित्र पहाडी तथा तराईका धेरैजसो भू-भागमा मध्यमदेखि भारी वर्षाको सम्भावना रहेको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार मनसुनको न्यून चापीय रेखा हाल सरदर स्थानकै आसपासमा अवस्थित रहेको छ ।
दिउँसोको समयमा देशका हिमाली तथा पहाडी भेगमा साधारणतया बदली रहनेछ भने तराई क्षेत्रमा आंशिक रूपमा बादल लाग्ने अनुमान गरिएको छ । बागमती, गण्डकी र कर्णालीका पहाडी तथा हिमाली क्षेत्रका एकाध स्थानमा भारी वर्षाको जोखिम रहेको छ । यसैगरी कोशी, बागमती र कर्णालीका केही स्थानका साथै अन्य प्रदेशका थोरै स्थानहरूमा मेघगर्जन र चट्याङ्गसहित मध्यम वर्षा हुन सक्नेछ । बागमती र गण्डकीका तराई भू-भागका थोरै स्थान र बाँकी प्रदेशका तराई भेगका एक-दुई स्थानमा पनि चट्याङ्ग पर्नुका साथै वर्षाको सम्भावना दर्शाइएको छ ।
रातिको समयमा पनि देशभर साधारणतया बदली नै रहने पूर्वानुमान छ । कोशी, बागमती र गण्डकीका पहाडी तथा हिमाली भू-भागका एक-दुई स्थानमा भारी वर्षाको सम्भावना कायमै छ । यसैगरी हिमाली तथा पहाडी भेगका केही स्थान र तराईका थोरै क्षेत्रहरूमा मेघगर्जन र चट्याङ्गसहित मध्यमसम्मको वर्षा वा हिमपात हुन सक्ने महाशाखाले जनाएको छ ।
