काठमाडौँ । मुलुकभर मनसुनी प्रणाली बलियो बन्दै गएकाले बिहीबार देशका धेरैजसो भूभागमा पानी पर्ने संकेत देखिएको छ ।
मौसम पूर्वानुमान महाशाखाका अनुसार मनसुनको न्यून चापीय रेखा नेपालको तराई भूभाग नजिक सरेकाले देशभर यसको प्रत्यक्ष असर परेको हो ।
अहिले पनि देशभरिकै मौसम साधारणदेखि पूर्ण रूपमा बदलिएको छ । कोशी, बागमती, गण्डकी र लुम्बिनी प्रदेशका धेरै ठाउँमा तथा मधेश, कर्णाली र सुदूरपश्चिमका थोरै स्थानमा अहिले हल्कादेखि मध्यम खालको वर्षा भइरहेको छ ।
महाशाखाका अनुसार बिहीबार दिउँसो पहाडी तथा हिमाली क्षेत्रका धेरै ठाउँमा मेघगर्जन र चट्याङसहित पानी पर्ने सम्भावना छ । तराई क्षेत्रका पनि विभिन्न स्थानमा चट्याङसहित वर्षाको आकलन गरिएको छ । विशेषगरी कोशी, बागमती, गण्डकी, लुम्बिनी र कर्णाली प्रदेशका पहाडी भूभाग तथा लुम्बिनीको तराईका केही ठाउँमा ठूलो पानी पर्न सक्ने भएकाले सतर्क रहन भनिएको छ ।
यस्तै, रातिको समयमा पनि मौसम पूर्ण रूपमा खुल्ने छैन । गण्डकी, लुम्बिनी, कर्णाली र सुदूरपश्चिमका धेरै ठाउँ तथा बाँकी प्रदेशका केही क्षेत्रमा पानी पर्ने सम्भावना कायमै रहनेछ । राति गण्डकी, लुम्बिनी र कर्णालीका एक-दुई स्थानमा भारी वर्षाको समेत सम्भावना रहेकाले नदीतटीय क्षेत्र, पहिरोको जोखिम भएका पहाडी भूभाग र डुबान हुन सक्ने होचा स्थानमा विशेष सावधानी अपनाउन मौसमविद्हरूले आग्रह गरेका छन् ।
