काठमाडौँ । साताको अन्तिम कारोबार दिन शेयर बजार परिसूचक नेप्सेमा ओरालो यात्रा देखिएको छ । परिसूचक ७.३७ अंकले घटेर २६४३.८३ विन्दुमा ओर्लिएर कारोबार बन्द भएको छ ।
आज कुल ३४४ कम्पनीका ९७ लाख ५४ हजार ४०३ कित्ता शेयर रु. ४ अर्ब २७ करोड ५६ लाख ७५ हजार ४०२ बराबरमा खरिदबिक्री भए । उपसमूहतर्फ जीवन बीमा, माइक्रोफाइनान्स, म्युचुअल फण्ड र अन्य समूह बाहेक बाँकी सबै क्षेत्रका शेयर मूल्यमा वृद्धि दर्ता भएको छ ।
कारोबारका आधारमा माउन्ट एभरेष्ट पावरको शेयर मूल्यमा सकारात्मक सर्किट लागेको छ भने सर्वोत्तम पेन्ट्सको शेयर मूल्य १४.९९ प्रतिशतले बढेको छ । त्यसैगरी सुपर खुदी हाइड्रोको शेयर मूल्यमा १२.८३ प्रतिशतको बढोत्तरी देखिएको छ ।
आज सर्वाधिक कारोबार हुने कम्पनीहरूमा कृषि विकास बैंक बण्ड अग्रस्थानमा रह्यो, जसको रु. ७० करोड ८७ लाख बराबरको खरिदबिक्री भयो । दोस्रो स्थानमा रहेको खानीखोला हाइड्रोको रु. १७ करोड ९८ लाख बराबरको कारोबार भएको छ ।
