काठमाडौँ । कोलम्बियाको पश्चिमी क्षेत्रमा गएको ७.४ म्याग्निच्युडको विनाशकारी भूकम्पमा परी ज्यान गुमाउनेको सङ्ख्या कम्तीमा १३२ पुगेको छ भने ५७० भन्दा बढी घाइते भएका छन् ।
विपदका बीच पेरेरा सहरमा भूकम्पका कारण हावामै रोकिएको केबलकारको डिब्बा (क्याबिन) भित्र फसेका १६ जना यात्रुलाई करिब छ घण्टाको प्रयासपछि सकुशल उद्धार गरिएको छ । पेरेरा नगरप्रमुखको कार्यालयका अनुसार सोमबार बिहान गएको कम्पनका कारण रोकिएको केबलकारबाट दिउँसो सुरक्षित रूपमा यात्रुहरूलाई बाहिर निकालिएको हो । प्राविधिक एवं सुरक्षा जाँच पूरा नभएसम्मका लागि उक्त क्षेत्रको केबलकार सेवा पूर्ण रूपमा स्थगन गरिएको छ । पहाडी भूभाग रहेको कोलम्बियामा केबलकार मुख्य सार्वजनिक यातायातको माध्यमका रूपमा प्रयोग हुँदै आएको छ ।
यसै गरी, कफी उत्पादनका लागि प्रसिद्ध छिमेकी सहर मनिजालेसमा पनि संरचनात्मक क्षतिका कारण केबलकार सेवा बन्द गरी यात्रुहरूको उद्धार गरिएको छ । चोको क्षेत्रलाई केन्द्रविन्दु बनाएर गएको यस कम्पनबाट पेरेरा सहरमा मात्रै ६० जनाको मृत्यु भएको पुष्टि भएको छ ।
स्थिति नियन्त्रण बाहिर जान नदिन देशका पाँच प्रमुख सहरहरूमा ‘रेड अलर्ट’ जारी गरिएको छ । देशभर कम्तीमा ८६ वटा भवनहरू पूर्ण रूपमा भत्किएका छन् भने सुरक्षाका कारण सातवटा विमानस्थलले आफ्ना सम्पूर्ण उडान तथा सञ्चालन स्थगन गरेका छन् । अर्को मुख्य सहर क्यालीमा थुप्रै भवनहरू ढलेकाले भग्नावशेषमा फसेका मानिसहरूको खोजी तथा उद्धार कार्यमा स्थानीय बासिन्दा र उद्धारकर्ताहरू निरन्तर जुटिरहेका छन् ।
