काठमाडौँ । हाल देशभर मनसुनी वायु र पश्चिमी वायुको आंशिक प्रभाव कायमै रहेको मौसम पूर्वानुमान महाशाखाले जनाएको छ । महाशाखाका अनुसार मनसुनको न्यून चापीय रेखा भने सरदर स्थानभन्दा दक्षिणतर्फ अवस्थित छ ।
यस प्रणालीको प्रभावले गर्दा देशभर सामान्यतया बदली भएको छ । अहिले बागमती र गण्डकी प्रदेशका थोरै स्थानका साथै कोशी प्रदेशका एक-दुई ठाउँमा हल्कादेखि मध्यम वर्षा भइरहेको छ ।
आज दिउँसो देशभर साधारणतया बादल लाग्ने अनुमान गरिएको छ । कोशी, बागमती र गण्डकी प्रदेशका हिमाली भेगका केही स्थान र लुम्बिनी, कर्णाली तथा सुदूरपश्चिम प्रदेशका हिमाली भूभागका थोरै ठाउँमा मध्यम वर्षाको सम्भावना छ ।
त्यस्तै कोशी, बागमती र गण्डकीका पहाडी भूभागका धेरैजसो ठाउँ तथा लुम्बिनी, कर्णाली र सुदूरपश्चिमका पहाडी क्षेत्रका थोरै स्थानमा चट्याङ्गसहित मध्यम वर्षा हुन सक्नेछ । तराईका केही भागमा पनि चट्याङ्गसहित हल्कादेखि मध्यम वर्षाको आकलन गरिएको छ । कोशी, बागमती र गण्डकी प्रदेशका हिमाली तथा पहाडी भूभागका एक-दुई स्थानमा भारी वर्षाको समेत सम्भावना रहेको छ ।
आज राति कोशी प्रदेशसहित देशका हिमाली र पहाडी भूभागमा साधारणतया बादल लाग्नेछ भने तराई क्षेत्रमा आंशिक बदली हुनेछ । कोशी, बागमती, गण्डकी र कर्णालीका हिमाली भूभागका थोरै स्थान र बाँकी हिमाली क्षेत्रका एक-दुई ठाउँमा चट्याङ्गसहित वर्षाको सम्भावना छ ।
पहाडी भेगतर्फ कोशी र गण्डकीका केही स्थान, बागमतीका थोरै स्थान तथा लुम्बिनी, कर्णाली र सुदूरपश्चिमका एक-दुई स्थानमा मध्यम वर्षा हुन सक्ने महाशाखाले जनाएको छ । तराईका क्षेत्रहरूमा समेत ठाउँ-ठाउँमा चट्याङ्गसहित हल्कादेखि मध्यम वर्षाको सम्भावना रहेको छ ।
