काठमाडौँ । मुलुकभर मनसुनी वायुको प्रभाव कायम रहँदा आगामी केही दिन धेरैजसो स्थानमा मौसम बदली भई वर्षा हुने सम्भावना छ । जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानभन्दा केही उत्तरतर्फ सरिएकाले वर्षाको प्रभाव बढेको हो ।
हाल देशभर आंशिकदेखि साधारणतया बदली रहेको छ । कोशी, बागमती र गण्डकी प्रदेशका केही ठाउँमा हल्का वर्षा भइरहेको छ भने लुम्बिनी, कर्णाली, मधेश र सुदूरपश्चिमका थोरै स्थानमा पनि पानी परिरहेको छ ।
आज दिउँसो पहाडी र हिमाली क्षेत्रका धेरैजसो भू-भागमा मेघगर्जन र चट्याङसहित हल्कादेखि मध्यम वर्षा वा हिमपातको सम्भावना छ । तराई क्षेत्रका केही स्थानमा पनि चट्याङसहित मध्यम वर्षाको सम्भावना रहेको छ । साथै कोशी, बागमती, गण्डकी, कर्णाली, लुम्बिनी र सुदूरपश्चिम प्रदेशका केही सीमित स्थानमा भारी वर्षाको सम्भावना रहेकाले आवश्यक सतर्कता अपनाउन महाशाखाले आग्रह गरेको छ ।
रातिको समयमा पनि देशभरको मौसम बदली नै रहनेछ । देशका पहाडी तथा हिमाली भू-भागका केही स्थानमा मध्यम वर्षा वा हिमपातको सम्भावना छ भने तराईका थोरै स्थानमा वर्षा हुनेछ । सुदूरपश्चिम प्रदेशका एक-दुई स्थानमा राति पनि भारी वर्षा हुनसक्ने पूर्वानुमान छ ।
