काठमाडौँ । बंगलादेशको राजधानीमा सञ्चालन भइरहेको ‘बंगलादेश ट्राभल एन्ड टुरिजम फेयर २०२६’ मा नेपाली पर्यटन व्यवसायीहरूको उत्साहजनक सहभागिता रहेको छ ।
नेपाल पर्यटन बोर्डको नेतृत्वमा गएको १५ वटा नेपाली पर्यटन कम्पनीको टोलीले बंगलादेशी पर्यटकहरूलाई आकर्षित गर्न नेपालका प्रमुख गन्तव्य तथा पर्यटकीय गतिविधिहरूको प्रवर्द्धन गरिरहेको छ ।
तीन दिनसम्म सञ्चालन हुने उक्त मेलामा नेपालका हिमशृङ्खला, प्राकृतिक दृश्य, समृद्ध सांस्कृतिक सम्पदाका साथै पदयात्रा, पर्वतारोहण र साहसिक पर्यटनलाई विशेष प्राथमिकताका साथ प्रस्तुत गरिएको छ । ‘एआईमा आधारित पर्यटन, दिगो गन्तव्य’ भन्ने नाराका साथ आयोजना गरिएको यस मेलामा नेपाली व्यवसायीहरूले बंगलादेशी समकक्षीहरूसँग व्यावसायिक सम्बन्ध विस्तार गर्ने र नेपाल भ्रमणका लागि प्रोत्साहन गर्ने उद्देश्य राखेका छन् ।
यसैबीच मेला सुरु हुनुअघि अक्टोबर २८ मा नेपाल पर्यटन बोर्ड र ढाकास्थित नेपाली राजदूतावासको संयुक्त आयोजनामा ‘नेपालले बोलाइरहेको छ : भ्रमण गर्नुहोस्, अन्वेषण गर्नुहोस् र अनुभव लिनुहोस्’ शीर्षकमा विशेष प्रवर्द्धनात्मक कार्यक्रमसमेत सम्पन्न भएको थियो । उक्त कार्यक्रममा नेपालको पर्यटन क्षेत्रसम्बन्धी विविध प्रस्तुति, सांस्कृतिक झाँकी र व्यवसायीहरूबीच नेटवर्किङ छलफल भएको थियो ।
भौगोलिक सामिप्य र सांस्कृतिक समानतालाई ध्यानमा राख्दै पर्यटन बोर्डले बंगलादेशलाई नेपालको प्रमुख पर्यटक स्रोत बजारका रूपमा स्थापित गर्ने रणनीति लिएको छ । हिमाल र ट्रेकिङ बाहेक नेपाललाई आध्यात्मिक, सांस्कृतिक, वन्यजन्तु, तथा स्वास्थ्य र आरोग्य (वेलनेस) पर्यटनको उत्कृष्ट गन्तव्यका रूपमा चिनाउन बोर्डले आफ्ना गतिविधिहरू तीव्र पारेको छ ।
