बुटवल । भिक्षुणी तथा चर्चित गायिका आनी छोइङ डोल्माले लुम्बिनी विकास कोषको उपाध्यक्ष पदको औपचारिक जिम्मेवारी बुधबार सम्हालेकी छन् ।
मन्त्रिपरिषद्ले उनलाई उपाध्यक्षमा नियुक्त गरेको करिब एक महिनापछि उनले पदभार ग्रहण गरेकी हुन् । पद सम्हाल्नुअघि वा लगत्तै उनले लुम्बिनीमा रहेको मायादेवी मन्दिरमा पूजाअर्चना समेत गरिन् ।
गत ३० असोजमा बसेको मन्त्रिपरिषद् बैठकले डोल्मालाई कोषको उपाध्यक्ष पदमा मनोनयन गर्ने निर्णय गरेको थियो । लुम्बिनी विकास कोष ऐन, २०४२ को दफा ८ मा भएको व्यवस्थाअनुसार उनको पदावधि पाँच वर्षको रहनेछ । कोषकै कोषाध्यक्ष पदमा भने नेपाल प्रहरीका पूर्व अतिरिक्त महानिरीक्षक (एआईजी) रमेश शेखर बज्राचार्य नियुक्त भएका छन् ।
डोल्माको नियुक्तिसँगै लुम्बिनी क्षेत्रमा विरोधका स्वरहरू पनि उठेका छन् । ‘लुम्बिनी बचाउ अभियान’ ले नागरिकता तथा सम्पत्तिसँग जोडिएका प्रश्न उठाउँदै उनको नियुक्ति फिर्ता लिन माग गर्दै निरन्तर आन्दोलन र प्रदर्शन गर्दै आएको छ ।
आलोचना र विरोध जारी रहेकै अवस्थामा उनले कार्यभार सम्हालेकी हुन् । यसअघि नै उनले आफू सत्कर्ममा अडिग रहेको र जस्तोसुकै कठिन परिस्थितिमा पनि पूर्ण समर्पणका साथ जिम्मेवारी निर्वाह गर्ने स्पष्ट पारेकी थिइन् । साथै, सम्पत्ति शुद्धीकरणसँग सम्बन्धित विषय सन् २०१८ मै समाधान भइसकेको उनको जिकिर छ ।

