काठमाडौँ । कार्यवाहक प्रमुख सुनिता डंगोलले जगपूजा गरेसँगै काठमाडौँ महानगरपालिकामा जीवित देवता श्रीगणेश र श्रीभैरवको नयाँ निवासस्थान निर्माणको औपचारिक सुरुआत भएको छ ।
परम्परागत नेवारी वास्तुकला झल्किने गरी साढे तीन तलाको उक्त भवन निर्माण गर्न लागिएको हो ।
कुल ४ हजार १६ दशमलव २५ वर्गफिट क्षेत्रफलमा फैलिने यस भवन निर्माणका लागि ६ करोड ७ लाख ९५ हजार ५७ रुपैयाँ लागत अनुमान गरिएको छ । मौलिक स्वरूप कायम राख्न निर्माणमा इँटा, काठ, चुना र सुर्कीजस्ता परम्परागत सामग्रीहरूको प्रयोग गरिने महानगरपालिकाले जनाएको छ ।
संरचनागत रूपमा भवनको भुइँतलामा सत्तल र भण्डार कक्ष रहनेछ भने पहिलो तलामा दर्शन तथा निवास कक्षको व्यवस्था गरिनेछ । त्यसैगरी, दोस्रो तलामा भान्छा र शयन कक्ष निर्माण गरिने योजना छ ।
शिलान्यास कार्यक्रमपछि बोल्दै कार्यवाहक प्रमुख डंगोलले लामो समयको प्रयासपछि यो ऐतिहासिक कामले मूर्तरूप लिन लागेको बताइन् । साथै, उनले निर्माण कार्यलाई गुणस्तरीय र समयमै सम्पन्न गर्न स्थानीय समुदायको अपनत्व र निरन्तर निगरानी आवश्यक रहेकोमा जोड दिइन् ।

