बर्दिया । चण्डीगढबाट आएका एक भारतीय नागरिकसहित दुई जनाको बर्दियामा भएको बस दुर्घटनामा परी निधन भएको छ । यस दुर्घटनामा अन्य १५ जना यात्रु घाइते भएका छन् ।
गुलरिया नगरपालिका–११ लालपुरस्थित हुलाकी सडकखण्डमा शनिबार दिउँसो उक्त दुर्घटना भएको हो । नेपालगञ्जतर्फ जाँदै गरेको बा.५ ख ५६०५ नम्बरको मिनिबस र विपरीत दिशाबाट आउँदै गरेको भारतीय नम्बर प्लेटको सीएचओ१सीएम ९४३७ नम्बरको मोटरसाइकल आपसमा ठोक्किएका थिए । ठक्करलगत्तै मिनिबस सडकमा पल्टिएको थियो ।
दुर्घटनामा मोटरसाइकल चालक भारतको चण्डीगढ निवासी ३४ वर्षीय हुकुमबहादुर खत्री र मोटरसाइकलमा पछाडि सवार अन्दाजी ५५ देखि ६० वर्षका पुरुषको मृत्यु भएको जिल्ला प्रहरी कार्यालयले जनाएको छ ।
गम्भीर घाइते भएका दुवै जनालाई तत्काल उपचारका लागि बर्दिया जिल्ला अस्पताल, गुलरिया पुर्याइएको भए पनि चिकित्सकले मृत घोषणा गरेका थिए । बसमा सवार अन्य १५ जना घाइतेहरूको अवस्था र उनीहरूको विवरण भने खुल्न बाँकी रहेको छ ।

