काठमाडौँ । मुलुकको मौसमी प्रणालीमा अहिले स्थानीय र पश्चिमी वायुको संयुक्त असर देखिएको छ । जल तथा मौसम विज्ञान विभागका अनुसार यतिबेला देशका पहाडी तथा हिमाली क्षेत्रमा सामान्य बदली भएको छ भने तराईका भू-भागमा मौसम सामान्यतया सफा रहेको छ ।
आज दिउँसो कोशी, मधेश, बागमती र गण्डकी प्रदेशसँगै लुम्बिनी र कर्णालीका पहाडी तथा हिमाली इलाकामा आकाश बादलले ढाक्ने सम्भावना छ । सुदूरपश्चिम र लुम्बिनीका तराई क्षेत्रमा भने आज निकै गर्मी बढ्ने र तातो हावा चल्ने अनुमान गरिएको छ । कोशी, बागमती र गण्डकीका केही ठाउँहरू तथा मधेश लगायत अन्य पहाडी र हिमाली क्षेत्रका थोरै स्थानमा हल्कादेखि मध्यमसम्म वर्षा र हिमपात हुन सक्ने विभागले जनाएको छ ।
यसैगरी रातिको समयमा पनि कोशी, मधेश, बागमती र गण्डकी प्रदेशमा बदलीकै अवस्था रहनेछ । देशका अन्य पहाडी क्षेत्रमा आंशिक बादल लागे पनि तराईमा भने मौसम खुला रहनेछ । राति कोशी, मधेश, बागमती र गण्डकीका एक-दुई स्थानमा मेघगर्जन र चट्याङसहित हल्का वर्षा वा हिमपातको सम्भावना रहेको मौसम पूर्वानुमान महाशाखाले उल्लेख गरेको छ ।
