काठमाडौँ । इरानी सेनाले आफ्नो देशको आकाशमा अनुमतिबिना उडेको अमेरिकी ड्रोनलाई सफलतापूर्वक खसालेको दाबी गरेको छ ।
इरानी समाचार एजेन्सी तस्निमका अनुसार इरानी रिभोल्युसनरी गार्ड क्रोप्सको निगरानी टोलीले अमेरिकी सेनासँग सम्बन्धित उक्त मानवरहित विमानलाई तत्काल पत्ता लगाएको थियो । विमानले देशको सीमा उल्लंघन गर्दै शत्रुतापूर्ण उद्देश्य राखेको ठहर गर्दै सेनाले अत्याधुनिक क्षेप्यास्त्र प्रणाली प्रयोग गरी त्यसलाई खसालेको बताएको छ ।
यसैबीच, अमेरिकी राष्ट्रपति डोनाल्ड ट्रम्पले इरानसँग नयाँ सम्झौताका लागि हतार नगर्ने स्पष्ट पारेका छन् । फक्स न्युजलाई दिएको एक अन्तर्वार्तामा उनले अमेरिकाले आफ्ना सर्तहरू बिस्तारै लागू गराउन सफल भइरहेको दाबी गरे ।
राष्ट्रपति ट्रम्पले इरानसँग उत्कृष्ट सम्झौता हुने विश्वास व्यक्त गर्दै त्यसो हुन नसके सैन्य कदम चाल्ने चेतावनी समेत दिएका छन् । साथै, इरानले आणविक हतियार नबनाउने र नकिन्ने विषयमा प्रतिबद्धता जनाइसकेको समेत उनले उल्लेख गरे ।
