काठमाडौँ । मुलुकभर अहिले मनसुनी वायुको सक्रिय प्रभाव देखिएको छ । जल तथा मौसम विज्ञान विभागका अनुसार मनसुनको न्यून चापीय रेखा नेपालको पूर्वी भेगमा सरदर स्थानभन्दा केही दक्षिण र पश्चिमी भेगमा सरदर स्थानको आसपासमै रहेको छ ।
यसका कारण कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा साधारणतया बदली भएको छ भने मधेश र सुदूरपश्चिमका तराई क्षेत्रमा आंशिक बदली छ । अहिले कोशी, बागमती, गण्डकी र लुम्बिनीका धेरै ठाउँमा तथा कर्णाली र सुदूरपश्चिमका थोरै स्थानमा मेघगर्जन र चट्याङ्गसहित मध्यम वर्षा भइरहेको छ ।
आज दिउँसो देशभर साधारणतया बादल लाग्ने अनुमान गरिएको छ । देशका पहाडी तथा हिमाली भेगका केही स्थानमा मेघगर्जन र चट्याङ्गसहित मध्यम वर्षा तथा हिमपातको सम्भावना छ । लुम्बिनी र सुदूरपश्चिमका तराईका केही ठाउँ, मधेश प्रदेश र कोशी, बागमती तथा गण्डकीका तराईका थोरै स्थानमा चट्याङ्गसहित मध्यम वर्षा हुन सक्छ । कोशी, बागमती, गण्डकी र लुम्बिनी प्रदेशका पहाडी भूभागका एक-दुई स्थानमा भारी वर्षाको समेत सम्भावना छ । मधेश र लुम्बिनी प्रदेशको तराई क्षेत्रका केही ठाउँमा हावाहुरी चल्ने सम्भावना पनि रहेको विभागले जनाएको छ ।
यसैगरी आज राति देशभर पूर्ण रूपमा जस्तै बादल लाग्नेछ । हिमाली क्षेत्रका थोरै स्थानमा मेघगर्जन र चट्याङ्गसहित मध्यम वर्षा वा हिमपात हुन सक्छ । मधेश, कोशी, बागमती, गण्डकी र लुम्बिनीका पहाडी तथा तराई क्षेत्रका धेरै स्थान र कर्णाली तथा सुदूरपश्चिमका केही स्थानमा मध्यम वर्षाको आकलन गरिएको छ । रातिको समयमा कोशीको पहाडी र तराई क्षेत्रका थोरै स्थान तथा मधेश र गण्डकी प्रदेशका एक-दुई स्थानमा भारी वर्षाको समेत सम्भावना रहेकाले सतर्कता अपनाउन मौसमविद्ले आग्रह गरेका छन् ।
