काठमाडौँ । देशभर मनसुनी वायुको प्रभाव सक्रिय रहेकाले आगामी केही दिन धेरैजसो भू-भागमा बदली र वर्षाको सम्भावना रहेको छ ।
जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानभन्दा केही उत्तरतर्फ नेपालको तराई भू-भाग नजिक अवस्थित छ ।
यसको प्रभावले अहिले देशभर आंशिकदेखि साधारणतया बदली रहेको छ । कोशी, बागमती र गण्डकी प्रदेशका धेरैजसो स्थानमा मेघगर्जन र चट्याङ्गसहित मध्यम वर्षा भइरहेको छ भने लुम्बिनी, कर्णाली, सुदूरपश्चिम र मधेश प्रदेशका केही स्थानहरूमा पनि वर्षा सुरु भएको छ ।
आज दिउँसो कोशी, बागमती र गण्डकी प्रदेशका हिमाली भू-भागमा वर्षाका साथै हिमपातको सम्भावना छ । पहाडी तथा तराई क्षेत्रमा मेघगर्जन र चट्याङ्गसहित मध्यम वर्षा हुने पूर्वानुमान छ । बागमती, गण्डकी, कोशी, मधेश र लुम्बिनी प्रदेशका एक-दुई स्थानमा भारीदेखि धेरै भारी वर्षाको जोखिम रहेको महाशाखाले जनाएको छ ।
त्यस्तै आज रातिको समयमा पनि देशका हिमाली, पहाडी तथा तराईका भू-भागमा मेघगर्जनसहित वर्षा र हिमपातको क्रम जारी रहनेछ । मनसुन सक्रिय रहेकाले नदीमा पानीको बहाव बढ्न सक्ने, पहिरो जान सक्ने र यातायात प्रभावित हुन सक्ने भन्दै सर्वसाधारणलाई आवश्यक सतर्कता अपनाउन महाशाखाले आग्रह गरेको छ ।
