काठमाडौँ । भृकुटीमण्डपमा मंगलबारदेखि ‘नाइमा नेपाल मोबिलिटी एक्स्पो २०२६’ को दोस्रो संस्करण भव्य रूपमा शुभारम्भ भएको छ ।
नेपाल अटोमोबाइल इम्पोर्टर्स एण्ड म्यानुफ्याक्चरर्स एशोसिएशन (नाइमा) द्वारा आयोजित उक्त मेलाको उद्घाटन गर्दै अध्यक्ष ऋतु सिंह वैद्यले देशको अटोमोबाइल क्षेत्रलाई थप व्यवस्थित, मर्यादित र उत्तरदायी बनाउन संस्था लागिपर्ने प्रतिबद्धता व्यक्त गरिन् ।
स्थापनाको एक वर्षभित्रै सदस्य संख्या २१ बाट बढेर ३६ पुगेको जानकारी दिँदै उनले यातायातलाई विलासिता र राजस्व संकलनको माध्यम मात्र नमानी नागरिकको शिक्षा, स्वास्थ्य र रोजगारी जोड्ने आधारभूत पूर्वाधारका रूपमा लिन आग्रह गरिन् । नाइमाले हरित अर्थतन्त्रको सरकारी लक्ष्यलाई समर्थन गर्ने स्पष्ट पार्दै अध्यक्ष वैद्यले विद्युतीय, हाइब्रिड तथा अन्य नयाँ प्रविधिको कर प्रणाली, वर्गीकरण र परीक्षणमा नीतिगत स्पष्टता हुनुपर्नेमा जोड दिइन् ।
सवारी साधनको एसेम्बली, इथानोल ब्लेन्डिङ, ब्याट्री रिसाइक्लिङ र सवारी परीक्षण केन्द्र स्थापनाका लागि सरकारसँग सहकार्य गर्न नाइमा तयार रहेको उनले बताइन् ।
साथै, बारम्बार फेरिने नीतिका कारण लगानीकर्तामा अन्योल सिर्जना हुने भएकाले नयाँ नियम ल्याउनुअघि सरकारले निजी क्षेत्रसँग अनिवार्य परामर्श गर्नुपर्ने उनको भनाइ थियो ।
६ दिनसम्म चल्ने उक्त एक्स्पोमा ५५ वटा ब्रान्डका सवारी साधन प्रदर्शनमा राखिनुका साथै ४० वटा नयाँ मोडेल सार्वजनिक गरिनेछ । प्रदर्शनीसँगै वैदेशिक लगानी, ब्याट्री रिसाइक्लिङ र एआईको प्रयोगबारे ‘मोबिलिटी संवाद’ कार्यक्रमसमेत सञ्चालन हुनेछ ।
