काठमाडौँ । खप्तड अर्गानिक नेपालको आयोजनामा रिफ्लेक्सोलोजी, हाइपरपिग्मेन्टेसन तथा डन्डीफोर व्यवस्थापनसम्बन्धी एकदिने गोष्ठी सम्पन्न भएको छ ।
काठमाडौँको सुन्दरीजलमा जेठ २२ मा आयोजित उक्त गोष्ठीमा सौन्दर्य क्षेत्रमा ७ देखि १५ वर्षसम्मको अनुभव हासिल गरेका १९ जना ब्युटिसियनहरूको सहभागिता रहेको थियो । कार्यक्रममा छालाको स्वास्थ्य, रिफ्लेक्सोलोजीको प्रयोग र हाइपरपिग्मेन्टेसन तथा डन्डीफोर जस्ता समस्याको प्राकृतिक र वैज्ञानिक समाधानका विषयमा विस्तृत छलफल गरिएको थियो ।
गोष्ठीमा मुख्य प्रस्तुतकर्ताका रूपमा खप्तड अर्गानिक नेपालका संस्थापक तथा अध्यक्ष डा. तेजराज जोशीले प्रशिक्षण दिनुभएको थियो । नेपालको सार्वजनिक स्वास्थ्य प्रणालीमा ३५ वर्षभन्दा बढीको सेवा अनुभव सम्हाल्नुभएका डा. जोशी वरिष्ठ आयुर्वेदिक तथा एकीकृत चिकित्सा विशेषज्ञ हुनुहुन्छ । उहाँ जडीबुटी चिकित्सा, छालासम्बन्धी रोग तथा रोकथाम स्वास्थ्यका विशेषज्ञ हुनुका साथै एसिया र मध्यपूर्वका देशहरूमा अन्तर्राष्ट्रिय तालिम कार्यक्रमहरू सञ्चालन गरिसक्नुभएका अध्येता र अन्वेषक हुनुहुन्छ ।
कार्यक्रममा डा. जोशीले छालाको हेरचाहमा अपनाउनुपर्ने आधुनिक प्रविधि, आयुर्वेदिक उपाय र ब्युटिसियनहरूले दैनिक काममा अपनाउन सक्ने व्यावहारिक प्रविधिबारे जानकारी गराउनुभएको थियो ।
