काठमाडौँ । माध्यमिक शिक्षा परीक्षा (एसईई) को नतिजा छिटो सार्वजनिक भएसँगै यो वर्ष कक्षा ११ को नयाँ शैक्षिक सत्र पनि अगाडि नै सुरु हुने भएको छ ।
शिक्षा तथा मानव स्रोत विकास केन्द्रले आगामी असार १ गतेदेखि नै कक्षा ११ को पठनपाठन सञ्चालन गर्न सबै शिक्षा विकास तथा समन्वय इकाइहरूलाई परिपत्र गरेको छ ।
शैक्षिक सत्र २०८२ को एसईई नतिजा प्रकाशन भइसकेकाले असारको पहिलो हप्ताबाटै नियमित कक्षा सुरु गर्न केन्द्रले निर्देशन दिएको हो । विगतका वर्षहरूमा एसईईको नतिजा आउन झन्डै तीन महिना लाग्ने र साउन महिनापछि मात्रै कक्षा ११ को पढाइ सुरु हुने प्रचलन थियो । यस पटक भने परीक्षा नियन्त्रण कार्यालयले परीक्षा सकिएको एक महिनाभित्रै नतिजा सार्वजनिक गरेपछि पठनपाठनको तालिका पनि एक महिना अगाडि सरेको हो । यस्तै, यो वर्षको एसईई ग्रेडवृद्धि परीक्षा पनि आगामी असार १ गतेदेखि नै सञ्चालन हुने तय भएको छ ।
