काठमाडौँ । नेपाल प्रिमियर लिग (एनपीएल) को तेस्रो संस्करणको महाभिडन्तमा आज लुम्बिनी लायन्स र सुदूरपश्चिम रोयल्स आमनेसामने हुँदैछन् ।
कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा सुरु भएको उपाधि भिडन्तमा सुदूरपश्चिम रोयल्सले टस जित्दै पहिले बलिङ रोजेको छ । टस हारेसँगै लुम्बिनी लायन्सले सुरुवाती ब्याटिङको निम्तो पाएको छ ।
एनपीएलको इतिहासमा सुदूरपश्चिम रोयल्स लगातार तेस्रो पटक फाइनलमा प्रवेश गरेको हो । पहिलो संस्करणको उपाधि भिडन्तमा सुदूरपश्चिमलाई पराजित गर्दै जनकपुर बोल्ट्स च्याम्पियन बनेको थियो । दोस्रो संस्करणको फाइनलमा समेत सुदूरपश्चिमलाई नै स्तब्ध पार्दै लुम्बिनी लायन्सले ऐतिहासिक पहिलो उपाधि उचालेको थियो ।
आजको खेलमा लुम्बिनी उपाधि रक्षा गर्ने दाउमा छ भने सुदूरपश्चिम अघिल्ला दुई हारको बदला लिँदै पहिलो पटक ट्रफी उचाल्ने लक्ष्यसहित मैदान उत्रिएको छ ।

