म्याग्दी । मोफसलका ग्रामीण भेगका महिलालाई लक्षित गरी आयोजना गरिएको दुई दिने निःशुल्क स्वास्थ्य शिविरमा छ सयभन्दा बढी सर्वसाधारणले उपचार सेवा पाएका छन् ।
मालिका गाउँपालिका–६ दरवाङमा बुधबार सकिएको स्त्रीरोगसम्बन्धी उक्त विशेष शिविरमा ६१४ जना महिलाको स्वास्थ्य परीक्षण गरिएको हो । ‘कल्प इमपावर उमेन नेपाल’ को अग्रसरता तथा विराट क्यान्सर अस्पताल र विराट मेडिकल कलेजको प्राविधिक सहयोगमा ‘मातृत्व जोगाउने अभियान’ अन्तर्गत यो कार्यक्रम आयोजना गरिएको हो ।
ग्रामीण क्षेत्रमा पाठेघरको मुखको क्यान्सरको जोखिम न्यूनीकरण गर्ने, स्त्रीरोगसम्बन्धी चेतना फैलाउने र नागरिकको उपचारमा सहज पहुँच पुर्याउने लक्ष्यका साथ शिविर सञ्चालन गरिएको आयोजक संस्थाका अध्यक्ष पूजा कोइरालाले जानकारी दिए । उनका अनुसार परीक्षणका क्रममा पाठेघरको मुखको क्यान्सरको प्रारम्भिक लक्षण देखिएका १५ जना बिरामीलाई फेला पारिएको छ । ती महिलाहरूलाई थप तथा विस्तृत उपचारका लागि धवलागिरि प्रादेशिक अस्पतालमा पठाइएको छ । शिविरमा क्यान्सररोग विशेषज्ञ डा. विनोद अर्याल र स्त्रीरोग विशेषज्ञ बविता शाह सहितको टोलीले बिरामीहरूको स्वास्थ्य परीक्षण गरी आवश्यक परामर्श र निःशुल्क औषधि समेत वितरण गरेको थियो ।
दरवाङ आधारभूत अस्पतालको प्राङ्गणमा सञ्चालित सो शिविरमा मालिका गाउँपालिकाका साथै छिमेकी मङ्गला र धवलागिरि गाउँपालिकाका महिलाहरूले समेत उल्लेख्य सहभागिता जनाएका थिए । चेतनाको अभाव र सामाजिक सङ्कोचका कारण कतिपय महिलाहरू अझै पनि आफ्नो रोग लुकाएर बस्न बाध्य भएको स्थिति बुझेर यो अभियान चलाइएको शिविर संयोजक शिला पुनले बताइन् । विशेष गरी सानै उमेरमा विवाह गर्ने तथा शारीरिक र मानसिक रूपमा परिपक्व नभई आमा बन्ने किशोरीहरूमा यस्तो स्वास्थ्य समस्या बढी देखिने गरेको उनको भनाइ छ ।
स्वास्थ्य परीक्षण सुरु हुनुअघि जेठ १० गते मालिका गाउँपालिकाका विभिन्न वडाका २७ जना किशोरी तथा युवतीहरूलाई पाठेघरको मुखको क्यान्सर, यसका कारण र बच्ने उपायबारे अभिमुखीकरण दिइएको थियो । तालिमप्राप्त ती किशोरीहरूले जेठ ११ गते स्थानीय बस्तीहरूमा पुगेर स्वास्थ्य सचेतना जगाउने कार्य गरेका थिए ।
युवा महिलाहरूको सक्रियतामा स्थापित कल्प संस्थाले ‘मातृत्व जोगाउने अभियान’ मार्फत हालसम्म २० हजारभन्दा बढी महिलालाई सेवा पुर्याइसकेको छ । यस पटकको शिविर सम्पन्न गर्न मालिका गाउँपालिका र ‘जेके’ फाउन्डेसनले समेत सहयोग उपलब्ध गराएको संस्थाका कार्यक्रम विकास प्रमुख सम्राट थापाले जानकारी दिए ।
