काठमाडौँ । पाठेघरको मुख र स्तन क्यान्सरको समयमै पहिचान गरी उपचार गर्ने उद्देश्यले काठमाडौँ महानगरपालिकाले चलाएको स्वास्थ्य शिविरबाट थुप्रै महिला लाभान्वित भएका छन् ।
महानगरले वीर अस्पतालसँग मिलेर गरेको परीक्षणमा सहभागी २ हजार ७७९ महिलामध्ये ९० जनामा एचपीभी डीएनए संक्रमण फेला परेको छ । स्वास्थ्य विभागका अनुसार तीमध्ये १२ जनामा एचपीभी–१६, १३ जनामा एचपीभी–१८ र ६५ जनामा अन्य प्रजातिको एचपीभी संक्रमण पुष्टि भएको हो । चिकित्सकहरूका अनुसार यो संक्रमण देखिँदैमा क्यान्सर भइसकेको भने होइन, तर यसले भविष्यमा क्यान्सर हुन सक्ने जोखिमलाई बुझाउँछ ।
गत चैत १६ देखि वैशाख २१ सम्म चलेको यस अभियानमा नाम लेखाएका ३ हजार ४९४ महिलामध्ये २ हजार ९७५ जना मात्रै अस्पताल पुगेका थिए । तीमध्ये २ हजार ९६१ जनाको स्तन परीक्षण गर्दा ४११ जनाको म्यामोग्राम र ४९४ जनाको भिडियो एक्सरे गरिएको थियो । जाँचका क्रममा ११ जना महिलामा पाठेघरको मुखको क्यान्सरको प्रारम्भिक लक्षण भेटिएको छ, जसमा चार जना उच्च जोखिम र सात जना न्यून जोखिमको अवस्थामा छन् । यस्तै, स्तन परीक्षण गरिएकामध्ये चार जनाको बायोप्सी गर्दा दुई जनामा क्यान्सर प्रमाणित भई हाल उपचार सुरु भइसकेको छ ।
वडागत तथ्यांक हेर्दा वडा नम्बर २२ मा सबैभन्दा धेरै ११ जनामा संक्रमण देखिएको छ । वडा नम्बर १६ मा नौ जना, १४ र १५ मा सात–सात जना तथा वडा नम्बर ७ मा छ जना संक्रमित फेला परेका छन् ।
अर्कोतर्फ वडा नम्बर २, १२, १७, १८, २० र २१ का महिलामा भने कुनै संक्रमण पाइएन । स्वास्थ्यकर्मीहरूले ३० देखि ६० वर्षका महिलालाई हरेक पाँच वर्षमा एकपटक पाठेघरको मुखको परीक्षण गर्न र स्तनमा कुनै पनि किसिमको गिर्खा वा अस्वाभाविक परिवर्तन देखिएमा तुरुन्त चिकित्सकलाई देखाउन सुझाव दिएका छन् ।
