काठमाडौँ । जल तथा मौसम विज्ञान विभागको पछिल्लो पूर्वानुमान अनुसार आज देशभरको मौसम मुख्यतया बदली रहनेछ ।
हिमाली र पहाडी भू-भागका धेरैजसो क्षेत्रहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ भने उच्च हिमाली भेगमा हिमपात हुन सक्नेछ ।
दिउँसोपख देशका अधिकांश स्थानमा बादल लाग्नेछ । विशेष गरी कोशी, बागमती, गण्डकी, कर्णाली, लुम्बिनी र सुदूरपश्चिम प्रदेशका केही पहाडी तथा तराईका एक-दुई ठाउँमा भारी वर्षाको जोखिम रहेको विभागले जनाएको छ ।
मधेश प्रदेशका थोरै स्थानहरूमा पनि हल्का वर्षाको सम्भावना छ।रातिको समयमा पनि मौसम पूर्ण रूपमा सफा हुने छैन ।
कोशी, बागमती र गण्डकी प्रदेशका पहाडी तथा हिमाली क्षेत्रमा मेघगर्जनसहित वर्षा र हिमपातको क्रम जारी रहने पूर्वानुमान गरिएको छ ।
