काठमाडौँ, ३ फागुन । प्रधानमन्त्री सुशिला कार्कीले महाशिवरात्रिको पावन अवसरमा सम्पूर्ण नेपाली दिदीबहिनी तथा दाजुभाइहरूमा हार्दिक शुभकामना व्यक्त गरेकी छन् । आइतबार एक शुभकामना सन्देश जारी गर्दै उनले देशमा शान्ति, सद्भाव र समृद्धिको कामना गरेकी हुन् ।
शिव चेतना र मानवीय मूल्य
प्रधानमन्त्री कार्कीले आफ्नो सन्देशमा भगवान् शिवलाई आदियोगीका रूपमा स्मरण गर्दै शिव चेतनालाई मानवीय जीवनको मार्गदर्शकका रूपमा व्याख्या गरेकी छन् । “हामी सबै आदियोगी भगवान् शिवको आराधनामा समर्पित छौँ । शिव केवल एउटा नाम मात्र नभएर चेतना, संयम, करुणा र सहअस्तित्वका प्रतीक हुन्,” सन्देशमा भनिएको छ।
प्रकृति र दिगो विकासको सम्बन्ध
प्रधानमन्त्रीले आध्यात्मिक दर्शनलाई वातावरणीय मुद्दासँग जोड्दै शिव र शक्ति (प्रकृति) को अद्वैत सम्बन्धबारे चर्चा गरेकी छन् । उनले भनिन्- “शिव र शक्तिको सम्बन्धले हामीलाई सधैँ प्रकृतिसँग सहअस्तित्वमा बाँच्न प्रेरित गर्छ । यो पर्वले हामीलाई प्रकृतिको संरक्षण, स्वच्छता र दिगो विकासका लागि काम गर्ने ऊर्जा प्रदान गरोस् ।”
राष्ट्रिय समृद्धिको कामना
महाशिवरात्रि केवल एउटा धार्मिक पर्व मात्र नभई सामाजिक एकताको कडी भएको उल्लेख गर्दै प्रधानमन्त्रीले यसले नेपाली समाजमा आपसी भाइचारा र शान्ति कायम गर्न मद्दत पुग्ने विश्वास व्यक्त गरेकी छन् । उनले सन्देशको अन्त्यमा महाशिवरात्रि सबैका लागि समृद्धिको पर्व बनोस् भन्ने शुभेच्छा प्रकट गरेकी छन् ।
