काठमाडौँ । रुवाण्डामा आयोजना भइरहेको आईसीसी वुमेन्स च्यालेन्ज ट्रफीको आफ्नो पहिलो खेलमा नेपाली महिला टोली स्तब्ध बनेको छ ।
शनिबार भएको उद्घाटन खेलमा अमेरिकाले नेपाललाई ४४ रनको फराकिलो अन्तरले पराजित गरेको हो । अमेरिकाले प्रस्तुत गरेको १२४ रनको लक्ष्य पछ्याउने क्रममा नेपालको ब्याटिङ अर्डर पूर्ण रूपमा असफल देखियो । निर्धारित २० ओभरको समाप्तिमा ९ विकेट गुमाउँदै नेपाली टोलीले केवल ७९ रन मात्र जोड्न सक्यो ।
यसअघि टस जितेर पहिले ब्याटिङ गरेको अमेरिकाले निर्धारित २० ओभरमा ६ विकेटको क्षतिमा १२३ रनको मध्यम योगफल खडा गरेको थियो । कसिलो बलिङ र उत्कृष्ट फिल्डिङ गरेको अमेरिकाविरुद्ध नेपाली ब्याटरहरूले खुलेर खेल्न सकेनन् ।
प्रतियोगिताका लागि इन्दु बर्माको कप्तानीमा रहेको नेपाली टोलीमा पुजा महतो, रुबिना क्षेत्री, बिन्दु रावल लगायतका अनुभवी खेलाडीहरू रहेका छन् । मुख्य प्रशिक्षक हर्षल पाठकको नेतृत्वमा रहेको टोलीले अब अप्रिल १९ मा इटालीविरुद्ध आफ्नो दोस्रो खेल खेल्नेछ ।
रुवाण्डा क्रिकेट संघद्वारा आयोजित यो प्रतियोगिता मे २ सम्म चल्नेछ, जसमा नेपालसहित अमेरिका, इटाली, भानुआटु र आयोजक रुवाण्डा सहभागी छन् । नेपालले अब समूह चरणका बाँकी खेलहरूमा पुनरागमन गर्ने लक्ष्य राखेको छ ।
