विदेशको सपना, प्रवासी संघर्ष, मानसिक स्वास्थ्य, मनको पीडा र नेपालीपनको कथा बोकेको फिल्म ‘प्रवासी जीवन’

काठमाडौँ, ९ फागुन । अमेरिका जाने सपना बोकेर नेपालबाट उडेको एउटा युवा, त्यहाँको चकाचौंधमा हराएको उसको पहिचान, र एक्लोपनले निम्त्याएको मानसिक संघर्ष-यिनै विषयवस्तुको सेरोफेरोमा निर्माण भएको छ नयाँ नेपाली फिल्म ‘प्रवासी जीवन’।

भुटानी मूलका नेपाली भाषी कलाकार श्याम क्षेत्रीको परिकल्पना, निर्देशन र मुख्य अभिनय रहेको यो फिल्मले मनोरञ्जन मात्र नभई समाजको गहिरो यथार्थलाई पर्दामा उतार्ने प्रयास गरेको छ। यो फिल्म फागुन १५ गतेदेखि देशभर प्रदर्शनमा आउँदैछ ।

फिल्मको कथा : सपना र संघर्षको द्वन्द्व

‘प्रवासी जीवन’ ले नेपालबाट उज्ज्वल भविष्यको खोजीमा अमेरिका पुगेको एक युवाको कथा भन्छ। नयाँ परिवेश, भाषा, संस्कृति र एक्लोपनले उसलाई कसरी मानसिक रूपमा कमजोर बनाउँछ र त्यसबाट बाहिर निस्कन उसले कस्तो संघर्ष गर्नुपर्छ भन्ने कुरालाई फिल्मको मुख्य विषय बनाइएको छ।

निर्देशक क्षेत्री स्वयंले फिल्ममा मानसिक स्वास्थ्य समस्याबाट ग्रसित पात्रको भूमिका निर्वाह गरेका छन्। उनले भने, “हामी भौतिक रूपमा देखिने दुःखका धेरै चर्चा गर्छौं, तर मानसिक रूपमा भोगिरहेको यातनालाई बेवास्ता गर्छौं। त्यसैले हामीले त्यो समय र त्यहाँबाट निस्किएपछिको सुन्दर भविष्यलाई फिल्ममा देखाएका छौँ।”

निर्देशक श्याम क्षेत्री : शरणार्थी शिविरदेखि हलिउडको सहरसम्म

निर्देशक श्याम क्षेत्रीको आफ्नै जीवन पनि कम फिल्मी छैन। झापाको शरणार्थी शिविरमा जन्मिएर हुर्किएका उनी हाल अमेरिकामा बसोबास गर्छन्। “वैधानिक रूपमा नेपाली नागरिकता नभए पनि म आफूलाई नेपाली नै मान्छु,” क्षेत्री भन्छन्, “विदेशमा रहँदा नेपाली हुनुको अर्थ अझ गहिरो महसुस भयो।”

अमेरिकामा १७ वर्षको बसाइमा उनले देखेका डिप्रेसन, आत्महत्या र एक्लोपनका घटनाहरूले नै उनलाई यो फिल्म बनाउन प्रेरित गरेको हो। उनले यो फिल्म विदेश जाने सोच बनाइरहेका युवा र प्रवासमा रहेका नेपाली दुवैका लागि महत्त्वपूर्ण रहेको बताए।

फिल्मका प्रमुख विशेषताहरू

महानायक राजेश हमालको साथ

फिल्ममा महानायक राजेश हमालको पनि विशेष भूमिका रहेको छ। निर्देशक क्षेत्रीका अनुसार हमालले प्रवासी नेपालीहरूको संघर्षको कथा बुझेर कुनै सर्तविना यो परियोजनामा साथ दिएका हुन्। फिल्ममा अभिनेत्री सरिता लामिछाने र चर्चित हास्य कलाकार बुद्धि तामाङको पनि अभिनय रहेको छ।

निर्माण पक्ष र सङ्गीत

श्याम क्षेत्री प्रोडक्सन र नेशनल मिडिया प्रोडक्सनको संयुक्त निर्माण रहेको यो फिल्मको कथा, पटकथा र संवाद क्षेत्री आफैँले लेखेका हुन्। फिल्मको छायाङ्कन अमृत बिसुवाले गरेका छन् भने सम्पादन राम अधिकारीले गरेका छन्। फिल्मका गीतहरूमा प्रमोद खरेल र प्रताप दास जस्ता चर्चित गायकहरूको स्वर सुन्न सकिन्छ।